Sarrera
Espazioen aireztapena, ikerketa guztiek adierazten duten bezala, babes neurri garrantzitsuena da Covid-19rekin kutsatzeko arriskua murrizteko. Aerosolak, kutsatzeko bide nagusia direla argi geratu da. Hau azaltzeko, bi txosten ofizial aintzat hartu ditugu, bertan oso argi adierazten baita aireztapenaren garrantzia. Honez gain, infografia argi bat eta José Luis Jiménez zientzilariaren 5 minutuko bideoa adibide gisa hartu ditugu.
Horrela, Ermitaberrin Aireztapen Plana helburu argi batekin osatu dugu: gelan airearen kalitatea bermatzeaz gain, argi, tenperatura eta zarata baldintza egokiak bilatu nahi ditugu, lau ardatz hauen arteko oreka ahal den hobekien mantentzeko. Negua ahal den erosoen pasatu nahi dugu, segurtasuna bermatuz.
CSICek 2020ko azaroaren 3an argitaratu zuen “ikasgeletako aireztapenerako gida” ren aholkuei jarraituz, CO2 neurgailu bat erosi genuen. Izan ere, izakiok botatzen dugun CO2-a adierazgarria da gure inguruan izan dezakegun Covid-19ren karga birala kalkulatu ahal izateko.
2020ko azaroa geroztik, eskolako espazio gehienetan neurketak egin ditugu, leiho eta ateak modu desberdinetan irekiz, baita eguraldi baldintza ezberdinetan, konparaketak egin ahal izateko.
Aireztapenaren aldeko irizpide nagusiak
- Arrisku gutxieneko lekua kanpoan dago. Arrisku gehiena, aldiz, gela itxi batean izango dugu.
- Zero arriskua ez dago. Aireztapena zenbat eta hobea izan, orduan eta txikiagoa da kutsatzeko arriskua.
- Aireztapena gure babes neurri nagusia izango da. Gainontzeko neurriak, hala nola musukoak, distantzia eta higienea, oraindik ere beharrezkoak dira aireztapen neurriaren osagarri gisa. Aireztapen egokirik gabe, musukoak, distantziak eta higieneak ez dute eragin handirik izango kutsatzeko arriskua murrizteko.
- Kutsatzeko arriskua murrizteko, aireztapena aretoaren bolumenaren, pertsona kopuruaren eta adinaren, egindako jardueraren, inguruan dauden kasuen intzidentziaren eta hartu nahi den arriskuaren araberakoa da.
- Horrez gain, kanpoan dabilen haizea eta gelaren orientazioak garrantzia handia dute aireztapenean. Eguraldiak aireztapena egiteko modua erabat baldintzatuko digu, eta hau egunetik egunera aldatu egin daiteke haizearen, hotzaren, eguzkiaren edo euriaren arabera.
CO2 neurketen ondorioak
Aireztatzeko konfigurazio minimoa
- Aireztapen gurutzatua ezinbestekoa dela ikusi dugu. Hau da, atea beti irekita, leiho bat irekita eta gainontzeko leihoak oszilobatiente moduan irekita izatea gure konfigurazio minimoa da.
- Haize ahuleko egunetan edo orduetan (normalean goizaren hasieran haizea bare-bare dago), konfigurazio hau ezinbestekoa da aire kalitate arrunta mantendu ahal izateko.
- Saio bakoitzaren bukaeran aireztatze orokor bat egitea gomendatzen dugu, leihoak eta atea erabat irekiz. 2-3 minuturekin nahikoa da. Errekreoan berdin, ez da ordu erdi batez gela irekita edukitzea behar, minutu gutxi batzurekin airea berrituko baitugu. Errekreoan, aireztatze honen ondoren, leihoak itxi ditzakegu, beroa gordetzeko eta, ikasleak gelara berriz igotzean, leihoak berriz ireki.
- Konfigurazio minimo hau goiz osoan zehar mantenduko dugu. Etengabeko aireztatzea ezinbestekoa da.
Eguraldiaren araberako zehaztapenak
- Egun haizetsuetan, korronte gehiegi somatzen badugu, leihoa erabat ireki ordez oszilobatiente moduan ireki daiteke. Atea, beti ere, irekita izango dugu.
- Egun oso hotz eta haizetsuetan, leihoa guztiz irekita mantendu ezin badugu, aireztatze orokorra maizago egin beharko dugu (saio erdian eta bukaeran leihoak bizpahiru minutuz erabat ireki). Atea beti irekita mantenduko dugu, eta oszilobatienteekin jokatu.
- Goizeko 9:00etan, berotasuna mantentzeko, ez da komeni gela aireztatzea, gau osoa pasatu ondoren ez baitago birus kargarik. Horren ordez, aireztapen arruntarekin hasiko gara (leiho 1 + atea + oszilobatienteak), beti ere ikasleak gelara igotzen diren momentutik aurrera.
- Ikasleei arropa gehiago janzteko gomendioa luzatzen diegu. Barruko kamiseta termikoa ekartzea komenigarria da, batez ere 2. eta 3. zikloetan, eserita denbora asko pasatzen dute eta.
Gelaz gelako zehaztapenak
Ikasgela arrunt guztiez gain, eskolako espazio desberdinek banan-banako aireztapena behar dute, gela bakoitzaren tamaina, egitura eta kokapenaren arabera beti ere.
Psikomotrizitate gela
- Bi ateak irekita izango ditugu, eta ahal diren leiho guztiak irekita ere.
- Gela honetan hotza ez da arazo, lagungarri baizik, haurren mugimendua handia delako.
Informatika gela
- Gela honetan ahal dugun guztia irekiko dugu: kanpora ematen duen leihoa, pasabiderako leihoa eta atea.
Areto Nagusia
- Gela honetan Musika eta, euria egiten duen kasu batzuetan, Gorputz Hezkuntza ematen dugu. Bi kasuetan aire kutsatua erraz aski pilatu daiteke, ekintza mugituak direlako.
- Musikako kasuan, ateak itxita izango ditugu, baina leihoak kasu horretan irekita egongo dira, bai atzekoak bai patio txikira ematen duten bi leiho handiak.
- Gorputz Hezkuntzan leihoez gain, ateak irekita izango ditugu, ariketak oztopatzen ez dituzten bitartean. Euriak gogor jotzen badu (eta, ondorioz, leihoak pixkat itxi beharrean baldin bagaude), ateak irekita egongo dira.
- Gela hau bilera txikiak egiteko erabiltzen bada, korrontea sortzen duen konfigurazioa erabiliko dugu (atzeko eta aurreko leiho bat ireki, atea + leiho bat, etab.). Aireztatzea pertsona kopuruaren arabera indartu beharko da, leiho gehiago edo/eta ateak irekiz.
Gorputz Heziketa gela
- Bi ateak irekita izango ditugu eta, horrekin batera, leiho guztiak ere irekita.