Ermitaberri Ikastetxe Publikoa
Ermitaberri Ikastetxe Publikoa Burlatan euskarazko irakaskuntza dohainik eskaintzen duen eskola bakarra da.
Orri honetan 2019ko udako euskarazko kanpaldi guztien bilduma egingo dugu. Eskaintzak leku desberdinetatik jasotzen ari gara eta hauek zuenganatuko dizkizuegu, zuen aukeraketa errazteko asmoz.
Aurreko urteetan kanpaldi guztien zerrenda jaso ohi genuen; momentuz aurten ez dugu halakorik jaso, beraz, bitartean udalekuen bilduma Ermitaberrin osatuko dugu. Edozein berrikuntza orri honetan txertatuko dugu:
Ermitaberri Ikastetxe Publikoan aurrera daramagun SKOLAE programaren garapenaren osagarri gisa eta familia batzuen eskaerari erantzuteko, Mayra Pérez Suárez, Sexologoa eta Burlatako EAZ zentruko Hezitzailearekin harremanetan jarri gara, Lehen Hezkuntzako 5. eta 6. mailako familiei zuzendutako Sexualitate eta afektibitate gaiaren inguruko formakuntza tailerra egiteko.
Jarduera hau maiatzaren 28, 29 eta 30ean izango zen, arratsaldez 15:30etatik 17:15etara.
Azken urteotan bezalaxe, Ermitaberrin Nafar Gobernuak fruta eta barazkiak jateko bultzatzen duen kanpainan parte hartuko dugu, “Osasuntsu Hazi” programan hain zuen ere. Osasuntsu Hazi programa Haur Hezkuntzako ikasle guztiei eta Lehen Hezkuntzako 1. eta 2. mailako ikasleei zuzendua dago. Hemen informazio gehiago duzue.Osasuntsu Hazi programa 2019ko otsailaren 25ean hasi zen eta 13 asteko iraupena izango du, ekainaren 14a arte, hau da, ikasturtea bukatu baino astebete lehenago. Horrela, 13 aste hauetan zehar Nafar Gobernuak fruta eta barazkiak dohainik banatuko ditu. Beraz, “Hamaiketako Osasuntsuak” proiektuaren osagarri gisa, fruta eta barazki ezberdinak egunero banatuko dizkiegu Haur Hezkuntzako eta Lehen Hezkuntzako 1. eta 2. mailako ikasle guztiei, ikasturte osoan zehar egiten dugun bezala. Ekaineko azken astean, 17tik 21era alegia, fruta eskolak erosiko du, Hamaiketako Osasuntsuak proiektuari so eginez.
Gure ohiturari jarraituz, Ermitaberrin aurten ere Burlatako Martingala ospatu dugu, Inauteriak alegia. Ospakizuna Lukas Aierbekoren epaiketarekin hasi dugu, 6. mailako ikasleen eskutik. Ondoren, denok elkarrekin Ermitaberriko patioan dantza egin dugu, epaiketaren emaitza ospatzeko. Burlatan zehar kalejiran irten gara, ikasle, irakasle eta gurasoekin, Udaletxe aurrean dantza ere egiteko. Ermitaberrirako bueltan, Lukas Aierbeko gaizkilea erre dugu. Horren aurretik, berriz ere epaiketaren antzerkia eskaini diegu familia guztiei. Lukasen erreketarekin aurtengo Martingalari bukaera eman diogu.
Guraso Eskola proiektuaren barne, “Gurasoen Hezkuntza” tailerra 2019ko martxoa eta apirileko egun desberdinetan izango da. 3 eta 6 urte bitarteko seme‐alabak dituzten gurasoendako zuzenduta dago eta debaldeko lantegia da. Bertan parte hartzeko aldez aurretik izena eman behar da.
“Guraso Eskola” Osasun Departamentuaren proiektua da, Nafarroako Osasun Publikoaren eta Lan Osasunaren Institutuaren (NOPLOI) Osasuna Sustatzeko eta Politika guztietan Txertatzeko Atalak koordinaturikoa eta Herritarrendako Osasun Eskolaren barnekoa.
Eskolak gurasoen eginkizun babesgarri eta hezigarriaren euskarri izatea du xede, gurasoek seme-alabak autonomiaz, segurtasunez eta beren buruarekiko konfiantzaz hezi eta zaintzeko dauzkaten gaitasun eta baliabideen garapena sustatuz.
Osasun Departamentuak eta Hezkuntza Departamentuak antolaturik, Nafarroako ikastetxeetan esnea banatzeko planean parte hartuko dugu.Honen helburua elikatze ohitura osasungarriak bultzatzea da, bertako produktuak ezagutaraztearekin batera.Programa hau Haur Hezkuntzako ikasle guztientzat eta Lehen Hezkuntzako 1. eta 2. mailako ikasleentzat bideratua dago.Astero, 2019ko otsailaren 25etik aurrera ikasturtea bukatu arte, 0,50 litro banatuko ditugu ikasle bakoitzeko. Esnea goi kalitatekoa izanen da, gertuko ekoizle batena, eta edateko unerik onenean egongo da.Alergia kasu guztiak kontuan izango ditugu. Aldi berean, familiaren batek programari uko egin nahi badio, etor zaitezte Zuzendaritzara horren berri ematera.
